Pandemiya səbəbindən İranın turizm sektoru 3 milyard dollardan çox gəlirdən məhrum olub
Cari ilin ötən dövrü ərzində İrana cəmi 450 min turist səfər edib ki, onların əksəriyyəti tibbi və ticarət məqsədilə gəliblər. COVID-19 pandemiyasına görə İranda turizm sənayesinin gəlirləri 94 faiz azalıb.
SəhərAzəri xəbər verir, bu sözləri İranın turizm nazirinin müavini Vəli Teymuri deyib. O bildirib ki, İranın turizm sənayesində çalışan 1,5 milyon nəfər hazırda işsizdir. Turizm sektoru 140 trilyon rial (3,3 milyard dollar) həcmində zərərə düşüb və bunun bərpası çox ağır olacaq.
Nazir müavini nəzərə çatdırıb ki, pandemiyadan əvvəl İranın turizm sektorundan gəliri 11,7 milyard dollar təşkil edirdi. İndi isə İran bu gəlirdən məhrum olub. Sərhədlərin bağlanması və təyyarə uçuşlarının qeyri-müəyyən vaxta kimi təxirə salınması turizm sahəsinə ciddi zərbə vurur.
