Rəisi Oman Sultanını Tehranda rəsmi şəkildə qarşılayıb
İran prezidenti Seyid İbrahim Rəisi Tehrana ilk səfərini edən Oman Sultanı Heysəm bin Tariq Ali Səidi rəsmi şəkildə qarşılayıb.
SəhərAzəri-nin məlumatına görə, paytaxt Tehrandakı Sədabad tarixi-mədəni Kompleksində keçirilən mərasim hər iki ölkənin dövlət himnlərinin səsləndirilməsi ilə başlayıb. Sonra prezident Rəisi və Oman Sultanı fəxri qarovul dəstəsinin qarşısından keçiblər və onları müşayiət edən yüksək səviyyəli nümayəndə heyətinin üzvləri bir-birlərinə təqdim ediblər.
Qəbuldan sonra prezident Rəisi və Sultan Heysəm təkbətək danışıqlar aparacaqlar, iki liderin qarşılıqlı maraq doğuran ikitərəfli məsələləri, o cümlədən regional sabitlik, iqtisadi və siyasi qarşılıqlı əlaqələr, eləcə də mədəni mübadilələri müzakirə edəcəyi gözlənilir.
Daha sonra hər iki ölkənin yüksək səviyyəli nümayəndə heyətləri arasında birgə iclas keçiriləcək.
Sultan Heysəmin prezident Rəisinin dəvəti ilə Tehrana səfəri iki regional müttəfiq arasında diplomatik münasibətlərdə mühüm mərhələdir.
Əhəmiyyətli səfər zamanı iqtisadiyyat, investisiya və enerji sahələrində dörd əməkdaşlıq sazişinin imzalanması gözlənilir.
Sazişlər İran və Oman arasında iqtisadi əlaqələri daha da gücləndirmək, daha çox müştərək müəssisələr və strateji tərəfdaşlıqlar üçün yol açmaq məqsədi daşıyır.
Hər iki ölkənin rəsmiləri bildiriblər ki, səfər həm də diplomatik əməkdaşlıq üçün yeni yollar açacaq və yüksək səviyyədə dialoq və əlaqənin artırılması üçün zəmin yaradacaq.
