Azərbaycan Respublikasının Prezidenti İlham Əliyev aprelin 28-də Avropa Yenidənqurma və İnkişaf Bankının prezidentinin təşəbbüsü ilə keçirilən videokonfransda hökumətin koronavirusla mübarizədə düzgün qərarlar çıxardığını söyləyib.

Azərbaycan dövlət başçısı bildirib: "Vaxtaşırı sərtləşdirdiyimiz məhdudlaşdırıcı tədbirlərin müsbət nəticəsi olmuşdur və artıq iki həftədir ki, ölkədə müsbət dinamika var. Yəni, sağalanların sayı yoluxanların sayından artıqdır. Ölüm faizinin nisbətən aşağı olması onu göstərir ki, işlər müsbət istiqamətdə aparılır." 

İ.Əliyev qeyd edib ki, pandemiya ilə mübarizədə vaxtın qazanılması, səhiyyə sistemimizin hazırlanması, mütəxəssis və həkimlərin səfərbər edilməsi və düzgün idarəçiliyin qurulması əsas hədəflərdən idi.

Onun sözlərinə görə, insanların həyatını və sağlamlığını qorumaq, sonra isə iqtisadiyyatın xilas edilməsi hazırda dövlətin prioritetini təşkil edir. Və bu sahələrdə müvafiq tədbirlər görülüb.