ATƏT-in Minsk qrupu Azərbaycan-Ermənistan sərhədində gərginliyin azalmasını alqışlayıb
ATƏT-in Minsk Qrupunun dünənki iclasından sonra həmsədrlər, həmçinin ATƏT-in fəaliyyətdə olan sədrinin xüsusi nümayəndəsi birgə bəyanat yayıblar.
SəhərAzəri APA-ya istinadla xəbər verir, bəyanatda dünən səhər saatlarında Azərbaycan-Ermənistan dövlət sərhədinin Tovuz rayonu istiqamətində gərginliyin azalması alqışlanıb və münaqişə tərəflərinə gərginliyin de-eskalasiyası üçün mümkün bütün tədbirləri görməyə dair çağırış edilib.
Bəyanatda tərəflər kəskin və bölgədəki vəziyyəti dəyişməyə yönəlmiş ritorikadan çəkinməyə çağırılıb: "Əldə edilən məlumata görə, 15 iyul səhər saatlarından etibarən Azərbaycan-Ermənistan sərhədində vəziyyət nisbətən sakitdir. Həmsədrlər və ATƏT-in fəaliyyətdə olan sədrinin xüsusi nümayəndəsi hərbi əməliyyatların azalmasını alqışlayır və tərəfləri de-eskalasiyanın davam etməsi üçün səy göstərməyə çağırır. Həmsədrlər tərəfləri kəskin ritorikadan və bölgədəki vəziyyəti dəyişdirməyə çalışmaqdan çəkinməyə çağırır. Həmsədrlər sülh prosesinin bərpasına əlverişli mühit yaratmağın zəruriliyini bir daha vurğulayırıar".
Bəyanatda, həmçinin qeyd olunub ki, həmsədrlər Azərbaycanın və Ermənistan xarici işlər nazirlərinin tezliklə Dağlıq Qarabağ münaqişəsinin tənzimlənməsinin vacib tərəfləri ilə bağlı əsaslı danışıqlar aparmasının təsdiqlənməsini alqışlayır və ATƏT müşahidəçilərinin şərtlər imkan verdiyi zamanda bölgəyə qaytarılmasının vacibliyini vurğulayıblar.
