İqtisadçı ekspert Azərbaycan hökumətini tənqid edərək bildirib ki, 3 beynəlxalq aeroportdan heç biri, heç zaman rentabelli və gəlirli fəaliyyət göstərə bilməyəcək.

SəhərAzəri-nin məlumatına əsasən, Qubad İbadoğlu bu barədə öz fikirlərini əsaslandırmaq üçün deyib: Qarabağın işğaldan azad edilmiş ərazilərində əhali məskunlaşmamışdan əvvəl hər biri yüz milyonlarla manata başa gələn 3 beynəlxalq aeroport mənasız layihələrdir və belə bahalı tikililərin və onların saxlanılmasının xərcləri dövlət büdcəsi üçün daimi yükə və əlavə məsrəfə çevriləcək. 

İqtisadçı qeyd edib ki, neft pulları hesabına maliyyələşən bu mənasız meqa layihələrə etiraz edir, eyni zamanda onların tikintisinə ayrılan xərclərlə, tikintiyə cəlb edilən şirkətlər və onların necə seçilməsi ilə bağlı məlumatların açıqlanmasını tələb edir.

O xəbərdarlıq edib ki, əgər xalqa doğru və düzgün məlumat verilməzsə, bütün bu nəhəng layihələr büdcənin talanmasına və korrupsiyasının inkişafına xidmət edər və çox keçməz oğurlanmış pulların sorağı ofşor zonalardan gələr.