ABŞ Azərbaycanda insan haqlarının pozulduğunu deyir
ABŞ Dövlət Departamentinin çərşənbə axşamı yaydığı hesabatda Azərbaycan Respublikası iqtidarını insan haqlarını kobud şəkildə pozmaqda ittiham edib.
SəhərAzəri-nin Turan-a istinadla verdiyi məlumatına əsasən, ABŞ Dövlət Departamentinin illik hesabatında Azərbaycanda həbsxanalarda sərt, bəzən isə həyat üçün təhlükəli saxlanma şəraitlərinə; özbaşına həbslərə; siyasi məhbuslara diqqət çəkib.
Azərbaycanda mühüm insan hüquqları pozuntularını - güc qurumlarının əməkdaşları tərəfindən qanunsuz və özbaşına qətllərdən, işgəncələrdən, ləyaqəti alçaldan davranışdan ölkə hüdudlarından kənarda insanlara qarşı siyasi motivli repressiyalara qədər pozuntuları əks etdirir bu barədə Turan-ın Vaşinqton müxbiri xəbər verib.
2021-ci ili nəzərdə tutan hesabatda söz azadlığı və KİV sahəsində ciddi məhdudiyyətlər, o cümlədən jurnalistlərə qarşı zorakılığı, böhtanın kriminallaşdırılması, həmçinin jurnalistlərin şübhəli ittihamlarla təzyiqə məruz qalması və azadlıqdan məhrum edilməsi; internet azadlığında ciddi məhdudiyyətlər, o cümlədən veb-saytların bloklanması; dinc toplaşma hüququnun faktiki olaraq qadağan edilməsi və assosisasiya azadlığına ciddi müdaxilə; yerdəyişmə azadlığına məhdudiyyətlər əksini tapıb.
ABŞ Dövət Departamentinin hesabatının Azərbaycan Respublikası ilə bağlı hissəsində əksini tapan digər pozuntular siyasi həyatda iştirakla bağlı ciddi məhdudiyyətlərdən; hökumətdə sistemli korrupsiyadan; cinsi meylə görə polisin insanlara qarşı amansızlığından; işçilərin birləşmək azadlığının ciddi şəkildə məhdudlaşdırılmasından və uşaq əməyinin ən pis formalarının mövcudluğundan ibarətdir.
