Separatçı lider yenə də Azərbaycana meydan oxudu
Harutyunyan erməniləri müstəqillik yolu ilə getməyə çağırır
Qarabağın separatçı lideri erməniləri müstəqillik yolu ilə getməyə çağırıb.
SəhərAzəri-nin məlumatına əsasən, qondarma Dağlıq Qarabağ Respublikasının başçısı Arayik Harutyunyan Rusiyada yaşayan xeyriyyəçi Vladimir Avaqyanın sponsorluğu ilə tikilmiş çoxfunksiyalı idman kompleksi ilə tanış olmaq üçün Xocavənd rayonunun Çartar qəsəbəsinə səfər edib.
Harutyunyan su təchizatı, yol tikintisi və iş yerləri kimi yerli məsələlərdən danışdıqdan sonra son hərbi-siyasi hadisələrə toxunaraq bildirib ki, bu hadisələr daha çox geosiyasi vəziyyətlə bağlıdır və hamıya məlumdur ki, Azərbaycanın guya mütəmadi təxribatları ermənilərin Qarabağdan çıxarılmasına nail olmaq, üçtərəfli bəyanatla yaradılmış kövrək sülhü və Rusiyanın sülhməramlı missiyasını gözdən salmaq məqsədi daşıyır.
O, üçtərəfli bəyanatla qurulan kövrək sülhdən və bu sülhün qorunması funksiyasını öz üzərinə götürən Rusiya sülhməramlı kontingentindən narazılığını gizlətməyib.
Separatçı lider sonra erməniləri “güclü səbrə” və Dağlıq Qarabağın müstəqillik yolundan dönməməyə çağırıb.
Bu arada separatçıların dırnaqarası xarici işlər naziri Davit Babayan Azərbaycan prezidenti İlham Əliyevin Dağlıq Qarabağda yaşayan ermənilərlə bağlı bəyanatına cavab olaraq deyib ki, Azərbaycan daxilində hər hansı status Qarabağ üçün qəbuledilməzdir.
Xatırladaq ki, İlham Əliyev avqustun 12-də “Qarabağda yaşayan ermənilərin nə statusu, nə müstəqilliyi, nə də xüsusi imtiyazları”nın olmadığını elan edib.
