Boz Kardinala artıq hamı dil uzadır
Arif Rəhimzadə: Ramiz Mehdiyev YAP-dan çıxarılacaq
Yeni Azərbaycan Partiyasının (YAP) Veteranlar Şurasının sədri Arif Rəhimzadə Ramiz Mehdiyevin partiyadan çıxarılacağını bildirib.
Arif Rəhimzadə bu barədə APA-ya açıqlamasında deyib ki, məsələ yaxın günlərdə YAP-ın aidiyyəti qurumlarının iclasında müzakirə olunacaq:
“Ramiz Mehdiyev nə YAP-ın, nə də YAP Veteranlar Şurasının üzvü kimi qala bilər. Məhkum olunan insan partiyada qala bilməz,” – deyə o vurğulayıb.
Bu açıqlama, Ramiz Mehdiyevin YAP-dan tam şəkildə uzaqlaşdırılması prosesinin rəsmi təsdiqi kimi qiymətləndirilə bilər. Rəhimzadənin sərt ifadələri göstərir ki, partiya rəhbərliyi onunla siyasi əlaqəni kəsməkdə qətiyyətlidir. Bu, eyni zamanda, hakimiyyətin daxilində köhnə elita ilə yeni nəsil arasında gedən səlahiyyət və nüfuz mübarizəsinin növbəti mərhələsi hesab olunur.
Xatırladaq ki, bir zamanlar Prezident Administrasiyasının rəhbəri və Azərbaycan elmi dairələrinin tanınmış simalarından biri olan akademik Ramiz Mehdiyev son illərdə həm siyasi, həm də hüquqi baxımdan ciddi tənqidlərə məruz qalıb. Onunla bağlı baş verən son həbsetmə hadisəsi və ona yaxın şəxslərin məsuliyyətə cəlb olunması ölkə siyasətində yeni mərhələnin başlandığı kimi qiymətləndirilir.
