Hüquq təşkilatı Azərbaycan hakimiyyətini tənqid etdi
Xaricdə yaşayan fəallara qarşı təzyiq intensivləşib
İnsan haqların nəzarət təşkilatı Human Rights Watch (HRW) bildirir ki, Azərbaycan hakimiyyəti son aylarda xaricdə yaşayan jurnalistlərə, blogerlərə və siyasi fəallara qarşı təzyiq və təqibləri intensivləşdirib.
Cam-Nyus xəbər verir: HRW-nin Avropa və Mərkəzi Asiya üzrə direktor müavini Georgi Qoqqiya yeni hesabatla bağlı deyib ki, hakimiyyət tənqidçi səsləri susdurmaq üçün qiyabi ittihamlar, qiyabi həbs qərarları, məhkəmə çağırışları və cinayət işlərindən istifadə edir.
Qeyd olunur ki, təzyiqlər əsasən sosial şəbəkələrdə hakimiyyətin korrupsiya, insan haqları pozuntuları və seçki saxtakarlıqları barədə danışan tanınmış media və ictimai fiqurları əhatə edir. Hədəfdə olanlar arasında Sevinc Osmanqızı, Qənimət Zahid, Tural Sadıqlı, Altay Göyüşov, Ərastun Oruclu və Fransada yaşayan bloger Məhəmməd Mirzəli kimi adlar var. Onların əksəriyyəti illərdir ölkədən kənarda yaşayır və onlayn platformalarda hökuməti tənqid edirlər.
O əlavə edib ki, Prokurorluq mart ayından etibarən mühacir fəallar barəsində bir sıra ağır maddələrlə cinayət işi açıb, lakin ittihamların heç biri real sübutlara əsaslanmır və sırf tənqidi çıxışları kriminal fəaliyyət kimi göstərmək məqsədi daşıyır. Bununla belə tənqidçilərin ölkəyə qayıtmayacağını bilən hakimiyyət onları prokurorluğa izahat üçün çağırır, gəlmədikdə isə qiyabi məhkəmələrə start verir. Son bir neçə ayda 24 nəfər barəsində qiyabi həbs və ittiham qərarları çıxarılıb.
HRW Azərbaycan hökumətini siyasi motivli ittihamları dərhal dayandırmağa, tənqidçi səslərə qarşı repressiyaları kəsməyə, ifadə və toplantı azadlığını təmin etməyə çağırıb.
