UEFA Avropa Liqasının qrup mərhələsində növbəti oyununu keçirən Qarabağ klubu ilk qələbəsini qazanıb.

Azərbaycanın "Qarabağ" futbol klubu UEFA Avropa Liqasının qrup mərhələsində növbəti oyununu keçirib. Baş məşqçi Qurban Qurbanovun yetirmələri G qrupunun II turunda Bakıda Fransanın "Nant" klubununa 3:0 hesabı ilə qalib gəlib.

Görüşün ilk 10 dəqiqəsi kəşfiyyat xarakteri dayışıb. 14-cü dəqiqədə Fransa təmsilçisinin futbolçusu Moyzes Simonun fərqlənməsinə qapıçı Şahruddin Məhəmmədəliyev mane olub. "Köhlən atlar" ilk hissənin ortalarından təşəbbüsü ələ alıb.

Oyunun 60-cı dəqiqəsində 25 yaşlı qanalı hücumçu Kvabena Ovusu hesabı açmağa müvəffəq olub. Bundan 5 dəqiqə sonra Kadi Borgesin ötürməsindən sonra Abdullah Zubir hesab arasındakı fərqi artırıb.

Oyunun 72-ci dəqiqəsində Marko Yankoviç baxımlı qola imza ataraq qonaqları bir daha oyuna mərkəzdən başlamağa məcbur edib.

Beləliklə, rəqibini 3:0 hesabı ilə məğlub edən "Qarabağ" qrup mərhələsində ilk qələbəsini qazanıb.

Bu arada Azərbaycan Respublikasının Prezidenti İlham Əliyevin bu qələbəyə reaksiyası diqqət çəkib. İlham Əliyev tviterdə paylaşım edib.

Paylaşımda deyilir: “Qarabağ (Azərbaycan) - Nant (Fransa) - 3:0. Darmadağın! Qarabağ Azərbaycandır!”

İlham Əliyevin bu tvitti sosial şəbəkə istifadəçiləri tərəfindən Fransanın Qarabağ məsələsi ilə bağlı anti-Azərbaycan mövqeyinə qarşı ehyamlı reaksiya kimi qiymətləndirilib.