Moskva Rusiya-İran-Azərbaycan görüşünə ümid edir
Mariya Zaxarova: Moskva Rusiya-İran-Azərbaycan formatı çərçivəsində görüşün təşkilinin mümkün olacağını gözləyir.
SəhərAzəri-nin məlumatına əsasən, Rusiya Xarici İşlər Nazirliyinin sözçüsü Mariya Zaxarova cümə axşamı brifinqdə bildirib ki, Moskva yaxın gələcəkdə üçtərəfli Rusiya-İran-Azərbaycan formatı çərçivəsində görüşün təşkilinin mümkün olacağını gözləyir.
"Ümid edirik ki, yaxın gələcəkdə üçtərəfli görüşün gündəliyi və şərtləri ilə bağlı konsensusa nail olmaq mümkün olacaq. Biz də öz növbəmizdə buna öz töhfəmizi verməyə hazırıq", - deyə diplomat üçtərəfli formatın perspektivləri haqqında suala cavab verərkən deyib.
O, həmçinin Moskvanın bu formata böyük əhəmiyyət verdiyinə diqqət çəkib, çünki format özünü “iqtisadiyyat, nəqliyyat və energetika sahələrində birgə layihələrin praktiki həyata keçirilməsinə diqqət yetirməklə qarşılıqlı fəaliyyət üçün effektiv platforma” kimi tanıtdırıb.
"Biz üçtərəfli əməkdaşlığın ölkələrimiz arasında qarşılıqlı faydalı əlaqələrin möhkəmləndirilməsinə və müasir şəraitdə, o cümlədən Şimal-Cənub beynəlxalq nəqliyyat dəhlizində yüksək tələbat olan dayanıqlı nəqliyyat infrastrukturunun yaradılmasına mühüm töhfə verəcəyini gözləyirik", - Zaxarova bildirib.
Rusiya Xarici İşlər Nazirliyinin nümayəndəsi qeyd edib ki, “bu, həm üçlüyün ticarət dövriyyəsinin daha da artırılması, həm də üç dövlətin maraqlarına uyğun olaraq fasiləsiz tranzit daşımalarının təmin edilməsi baxımından vacibdir”.
