Paşinyan Administrasiyası Dağlıq Qarabağ hakimiyyəti ilə fikir ayrılığını inkar edir
“Qarabağ erməniləri ilə təmasların ardı kəsilməyib”
Paşinyan administrasiyası Dağlıq Qarabağdakı hakimiyyətlə təmasları dayandırması ilə bağlı mətbuatda yayılan xəbərləri təkzib edib.
Baş nazirin mətbuat katibi Nazeli Bağdasaryan yayılan şayiələrlə bağlı bildirib ki, müxtəlif KİV-lər Ermənistan hakimiyyətinin bütün səviyyələrdə Dağlıq Qarabağdakı həmkarları ilə təmaslarını dayandırması ilə bağlı xəbərlər yayırlar. Bundan başqa, hesabatlarda Laçın dəhlizinin blokadası nəticəsində yaranmış humanitar böhranın Ermənistan hökumətinin gündəmindən kənarda qaldığı iddia edilir. Lakin bunlar həqiqəti əks etdirmir.
Onun sözlərinə görə, Nikol Paşinyan Arayik Arutyunyanla intensiv, gündəlik əlaqə saxlayır və bunu Arutyunyan ictimai çıxışlarında və müxtəlif formatlarda təsdiqləyib. Bundan əlavə Dağlıq Qarabağ əhalisinə dəstək məqsədilə 2022-ci ilin sonlarında baş nazirin müavini Tiqran Xaçatryanın rəhbərliyi ilə işçi qrup yaradılıb.
