İrəvan “sülh kəsişməsi” layihəsini təbliğ edir
Paşinyan: Ermənistan yeni dəmir yolları tikməyə hazırdır
Ermənistan regionda kommunikasiyaların açılması üçün təsirli və konkret addımlar atmağa hazırdır.
Ermənistanın baş naziri Nikol Paşinyan dənizə çıxışı olmayan inkişaf etməkdə olan ölkələrin nazirlərinin görüşündə “Sülh kəsişməsi” layihəsini təqdim edərkən deyib ki, Ermənistan Türkiyə və Azərbaycanla regionda nəqliyyat kommunikasiyalarının açılması imkanlarını müzakirə edir. “İrəvanın nəqliyyat kommunikasiyalarının açılmasına yanaşmaları sülh kəsişməsi konsepsiyasında öz əksini tapıb. Əminəm ki, bu təşəbbüsün həyata keçirilməsi region ölkələrinə daha çox imkanlar yaradacaq, həm də Ermənistanın dənizə çıxışını təmin edəcək”, - deyə baş nazir bildirib.
Paşinyan onu da vurğulayıb ki, Ermənistan Azərbaycanla nəinki keçmişdə mövcud olan dəmir yolu əlaqəsini bərpa etməyə, həm də yenilərini tikməyə hazırdır. Məsələn şimal istiqamətində Qazaxı Ermənistanın Tavuş rayonu ilə, cənub istiqamətində isə Azərbaycanın qərb rayonlarını Naxçıvanla birləşdirən yollar salına bilər.
