Ermənistanda həbslərə başlanılıb
Səhər saatlarında Ermənistanın müxtəlif şəhərlərində kütləvi həbs dalğası başlayıb. “Sputnik Armeniya” xəbər verir ki, bu barədə vəkil Ruben Melikyan məlumat verib.
SəhərAzəri-nin məlumatına əsasən, vəkil Ruben Melikyanın sözlərinə görə, təhlükəsizlik qüvvələri Martuni, Qavar, Vanadzor, Ucan və İrəvanda etiraz hərəkatının tərəfdarlarını saxlayırlar.
Ötən gün “Daşnaksütyun”un Vayk və Yeqnadzordakı ofislərində axtarışlar aparılıb və bu partiyanın üzvləri saxlanılıb. İstintaq Komitəsinin mətbuat xidməti isə bir məlumatda bildirib ki, vətəndaşların aksiyalarda iştirakına maddi həvəsləndirməkdə şübhəli bilinən 11 nəfər saxlanılıb.
İdarənin materiallarına görə, sosial şəbəkədə 5 müxtəlif hesabda 6 yazı yayılıb, orada “Vətən uğrunda Tavuş” hərəkatının aksiyalarında iştirak edənlərin maddi həvəsləndirilməsi müzakirə olunub. “Xüsusən, çəkilişlərdə ayrı-ayrı şəxslər insanların aksiyalarda iştirakının təmin edilməsi, nəqliyyat vasitələri ilə təmin olunması, papaqlara pul ayrılması, insanların yığıncaqlarda iştirakını təmin etmək üçün partiya tərəfindən maliyyə vəsaitlərinin mərkəzləşdirilməsi, Milli Məclisə hücum, həmçinin insanların iclaslarda iştirakı üçün ayrılan vəsaitin çatışmazlığı və onlar arasında yaranan fikir ayrılıqları müzakirə olunur”, - İstintaq Komitəsi qeyd edib.
Məlumatda deyilir ki, bir sıra şəxslər dindirilib, onlarla ünvanda axtarışlar aparılıb, istintaq üçün vacib olan materiallar götürülüb. İbtidai istintaq davam edir.
“Vətən naminə Tavuş” hərəkatının lideri arxiyepiskop Baqrat Qalstanyan isə bütün siyasi və ictimai qüvvələri sonuncu dəfə etiraz aksiyalarına qoşulmağa dəvət edib. O vurğulayıb ki, 12 iyun hadisələrinə görə bütün məsuliyyət Paşinyan və komandasının üzərinə düşür.
Hərəkat lideri bütün siyasi və ictimai qüvvələrə də müraciət edərək onları etiraz aksiyalarına qoşulmağa dəvət edib. O qeyd edib ki, bu, sonuncu dəvətdir və bundan sonra heç bir bəhanə qəbul edilməyəcək.
Xatırladaq ki, bu günlərdə İrəvanda arxiyepiskop Baqrat Qalstanyanın rəhbərlik etdiyi “Vətən üçün Tavuş” hərəkatı hakimiyyətin istefası tələbi ilə etiraz aksiyaları keçirir. İyunun 12-də axşam saatlarında parlament binası yaxınlığında toqquşmalar baş verib, polis etirazçıları dağıtmaq üçün səs-küylü qumbaralardan istifadə edib. 18-i polis olmaqla, ümumilikdə 101 nəfər yaralanıb. Öz növbəsində İstintaq Komitəsi kütləvi iğtişaşların təşkili maddəsi ilə iş başlayıb.
