SAHAR

Suriya hava qüvvələri ölkənin qərbində yerləşən Həma vilayətinin şimalında Ceyşül-Fəth terror qruplaşmasının mövqelərinə zərbələr endirib.

İRİB-nin verdiyi məlumata görə, suriyalı bir hərbi qaynaq bildirib ki, Suriya ordusu hava qüvvələrinin Həma şəhərinin ətraf məntəqələrində terrorçuların mövqelərinə qarşı hücumları onlarla terrorçunun ölməsi və yaralanmasına səbəb olub.

Başqa bir məlumata görə, Suriya ordusu ölkənin cənubunda, Dəra məntəqəsində Əlsəd şose yolunun şərq hissəsində və Naziheyn düşərgəsində Ənnüsrə Cəbhəsi terror qruplaşmasının mövqelərinə zərbələr endirib. Bu əməliyyatlar zamanı bir qrup terrorçu məhv edilib.

Suriya ordusu Ənnüsrə Cəbhəsi və onun tabeliyində olan digər terrorçu dəstələrin ölkənin qərbində, Homs şəhərinin ətrafındakı mövqelərinə qarşı da hərbi əməliyyatlar həyata keçirib.

Bu hücumlar zamanı bir neçə terrorçu dəstə başçısı daxil olmaqla onlarla terrorçu ölüb və yaralanıb.

Homs valisi Təlal Bərazi ordu qüvvələri və müttəfiq qüvvələrin Homs vilayətinin şərqində yerləşən Şair qaz yatağının ətraf məntəqələrini terrorçuların işğalından azad etmək üzrə səylərinə işarə edib və deyib: Suriya ordusunun terrorçular ilə savaşı davam edir.

Həmçinin, Dəməşq əyalətinin valisi Əla Munir İbrahim Vadi Bərda, Hərəsta və Duma məntəqələrinin Suriya dövləti ilə sülh müzakirələrinə qatılmaq və milli barışıq prosesinə qoşulmaq niyyətindən xəbər verib.

Milli Barışıq proqramı çərçivəsində silahlı ünsürlər Suriya ordusuna təslim olaraq, digər ərazilərə köçürülürlər.