Sabiq səfir İran-Azərbaycan əməkdaşlığından danışdı
"Əməkdaşlıq regionda sülh və sabitliyin güclənməsinə yardım edəcək"
İranın Bakıdakı sabiq səfiri bildirib ki, Tehran Azərbaycanla qarşılıqlı əməkdaşlığı gücləndirməkdə qətiyyətlidir.
SəhərAzəri-nin məlumatına əsasən, Möhsün Pakayin bu barədə deyib: “İranla Azərbaycan arasında əməkdaşlıq regionda sülh və sabitliyin güclənməsinə yardım edə bilər”.
Sabiq səfirin sözlərinə görə, Azərbaycan baş nazirinin müavini Şahin Mustafayevin Tehrana son səfəri qonşu ölkələr arasında əlaqələrin möhkəmlənməsi istiqamətində önəmli rol oynayır: “İki ölkə arasında mövcud olan bəzi fikir ayrılıqlarının ardınca bu səfərin baş tutması İranın hazırkı hökumətinin qonşu və dost ölkə ilə münasibətləri qoruyub saxlamaqda ciddi iradəsinin, digər tərəfdən Azərbaycanın İran İslam Respublikası ilə yaxşı münasibətləri gücləndirməkdə qərarlı olduğunun göstəricisidir”.
O qeyd edib ki, hər iki ölkə dostluq münasibətini müsbət və konstruktiv məcrada davam etdirməkdə qərarlıdır: “Həqiqət budur ki, İranla Azərbaycan arasında müştərək iqtisadi əməkdaşlığın davam etdirilməsi regionda sülh və sabitliyin güclənməsinə yardım edə bilər”.
M. Pakayin vurğulayıb ki, Şahin Mustafayevin son səfərində İran və Azərbaycan arasında Rəşt-Astara dəmir yolunun tikintisi, gömrükdəki maneələrin aradan qaldırılması, ticarət mübadiləsinin artırılması üçün tariflərin azaldılması, turizmin inkişafı, Xəzərdə müştərək neft yataqlarının işlənməsi üçün çıxış yolunun tapılması və nəhayət Azərbaycanın işğaldan azad olmuş ərazisinin yenidən qurulmasında əməkdaşlıq sahələri müzakirə olunub.
