Türkiyə ABŞ-la ticarət savaşına girib
Ankara ABŞ-ın Türkiyədən idxal olunan məhsullara rüsumların artırılmasına reaksiyada Çin və Avropa Birliyi kimi Vaşinqtonla ticarət savaşını başlayıb.
Röyters İnformasiya Agentliyinin məlumatına görə, Türkiyənin iqtisad naziri Nihat Zeybəkçi cümə axşamı günü bildirib: Ankara bu gündən polada əlavə rüsumlara görə, ABŞ əleyhinə 266 milyon dollar dəyərində qarşılıqlı iqtisadi addımları tətbiq edəcək.
Zeybəkçi ABŞ-ın müxtəlif ölkələrlə ticarət savaşını qeyri-məntiqi və yorucu adlandıraraq deyib: Ankaranın Vaşinqton əleyhinə qarşılıqlı addımları 266 milyon dollar dəyərində idxal olunan müxtəlif məhsullar, o cümlədən avtomobil, sənaye avadanlıqları, neft-kimya məhsullarına şamil olur.
ABŞ prezidenti Donald Tramp 6 martda qərara alıb ki, idxal olunan polad və alüminiuma müvafiq olaraq 25 və 10% əlavə rüsum tətbiq etsin. Bu qərar dünyanın müxtəlif ölkələri tərəfindən tənqid atəşinə tutulub və ticarət savaşına bənzədilib.
