TBMM vampir rejimin əleyhinə qətnamə qəbul etdi
İsrail BMT və digər beynəlxalq təşkilatlardan qovulmalıdır!
Türkiyə Böyük Millət Məclisi (TBMM) avqustun 29-da keçirilən xüsusi iclasında “İsrailin Qəzzədə törətdiyi soyqırım siyasəti” ilə bağlı qətnaməni bütün partiyaların səsi ilə qəbul edib.
Qətnamədə işğalçı İsrailin BMT və digər beynəlxalq təşkilatlardakı üzvlüyünün dayandırılması çağırışı yer alıb.
Həmçinin bütün dünya ölkələrinin parlamentlərinə müraciət edilərək, İsraillə hərbi və ticari əlaqələrin tam kəsilməsi tələb olunub.
Sənəddə sionist rejimin Qəzzədə aclıq çəkdirməyi “məhv etmə silahı” kimi istifadə etdiyi və bunun nəticəsində əksəriyyəti qadın və uşaq olmaqla indiyədək təxminən 70 min insanın həlak olduğu qeyd olunur.
Bu arada Türkiyənin xarici işlər naziri Hakan Fidan parlamentdə çıxış edərək bildirib ki, Türkiyə ilə İsrail arasındakı bütün ticarət əlaqələri tamamilə dayandırılıb.
Nazirin sözlərinə görə, Türkiyə limanları İsrail gəmilərinə qapadılıb. Türk bayraqlı gəmilərin də İsrail limanlarına getməsinə icazə verilməyəcək. Həmçinin Türkiyənin hava məkanı İsrail təyyarələrinə bağlanıb.
Bu qərarın icraya qoyulması ilə İsraildən Azərbaycan Respublikasına silah daşıyan hərbi təyyarələr Türkiyə hava məkanından istifadə edə bilməyəcəklər.
Ötən il noyabr ayı Türkiyə İsrail prezidentinin təyyarəsini bu ölkənin hava məkanını keçməsinə icazə vermədi və onu Azərbaycanda COP29 iqlim konfransına planlaşdırılan səfərini ləğv etməyə məcbur etdi, may ayında isə Benyamin Netanyahu oxşar səbəbə görə Bakıya səfərini ləğv etdi.
