Hollandiya parlamenti Azərbaycana dair qətnamə qəbul edib
Hakimiyyət tərəfindən repressiyaların artdığı iddia olunur
Hollandiya parlamenti Azərbaycana dair qətnamə qəbul edib. Qətnamədə ölkədə repressiyaların artdığı bildirilir.
SəhərAzəri-nin məlumatına əsasən, oktyabrın 14-də Hollandiya parlamentinin demək olar ki, yekdilliklə qəbul etdiyi qətnamədə deyilir ki, Azərbaycanda hakimiyyətin müxalifət və vətəndaşlara qarşı repressiyaları artıb. Bu barədə Turan-a Sülh və Demokratiya İnstitutunun direktoru Leyla Yunus bildirib.
Onun sözlərinə görə, müzakirələrin təşəbbüskarı Sülh və Demokratiya İnstitutudur. Qurum Azərbaycanda insan hüquqlarının vəziyyəti və ölkədə 122 siyasi məhbusun olması barədə hesabatla parlamentə müraciət edib.
Sülh və Demokratiya İnstitutu bu problemlərə diqqəti dekabr ayında keçiriləcək "Şərq Tərəfdaşlığı" sammiti ərəfəsində yönəldib. Sammitə Azərbaycan prezidenti İlham Əliyev də dəvət edilib.
Leyla Yunusun sözlərinə görə Niderland parlamenti Avropa Komissiyasını "Azərbaycanda insan hüquqları ilə bağlı vəziyyətin pisləşməsini" nəzərdən keçirməyə çağırıb.
