Azərbaycanlı deputatlar Ermənistana gediblər, onlar etirazla qarşılanıblar
Milli Məclisin deputatları, AVRONEST PA-da Azərbaycan nümayəndə heyətinin üzvləri Tahir Mirkişili və Soltan Məmmədov Yerevana səfər ediblər.
SəhərAzəri-nin məlumatına əsasən,Ermənistan iqtidarındakı “Vətəndaş Müqaviləsi” Partiyasının deputatı Mariya Karapetyan bu xəbəri təsdiqləyib.
Fevralın 22-də Ermənistanın paytaxtı Yerevanda AVRONEST Parlament Assambleyasının komitə iclasları keçiriləcək.
Azərbaycan Respublikası Milli Məclisin Mətbuat və ictimaiyyətlə əlaqələr şöbəsindən verilən məlumata görə, tədbirlərdə Milli Məclisin deputatları, AVRONEST PA-da Azərbaycan nümayəndə heyətinin üzvləri Tahir Mirkişili və Soltan Məmmədov iştirak edəcəklər.
Deputatlar iclaslarda müzakirə olunacaq məsələlərə Azərbaycan tərəfinin mövqeyini bildirəcəklər.
Xatırladaq ki, AVRONEST Parlament Assambleyası 2011-ci ilin mayında təsis olunub.
Azərbaycanlı deputatların İrəvana səfərini eşidən bir qrup müharibə iştirakçısı azərbaycanlı deputatların ölkələrinə gəlişinə etiraz olaraq hava limanına gedən yolu bağlayıblar. "Zvartnots" Beynəlxalq Hava Limanına gedən yolu bağlayan qrup azərbaycanlıların İrəvana gəlməsinin əleyhinə olduğunu bildirib.
