İran səfirindən sevindirici xəbər
“Qarabağda istehsal edilən elektrik enerjisi İran vasitəsilə ixrac ediləcək”
İran İslam Respublikasının Azərbaycandakı səfiri bildirib ki, Qarabağda istehsal edilən elektrik enerjisi İran vasitəsilə ixrac ediləcək.
SəhərAzəri-nin məlumatına əsasən, səfir Seyid Abbas Musəvi bu barədə deyib: "Qarabağda istehsal ediləcək elektrik enerjisi İran vasitəsilə Naxçıvana, Türkiyəyə və Avropa ölkələrinə ixrac ediləcək."
Onun sözlərinə görə, İran da bu elektrik enerjisindən istifadə edəcək: "Gələcəkdə Qarabağda elektrik stansiyalarının tikintisində İran şirkətlərinin iştirakı nəzərdə tutulur".
Səfir əlavə edib ki, İran şirkətlərinin Qarabağda həm təhsil kompleksinin, həm də xəstəxananın tikintisində iştirakı nəzərdə tutulur: “Bu istiqamətdə iş aparılır”.
Qeyd edək ki, 1994-cü il 2 iyul tarixində “Azərbaycan Respublikası ilə İran İslam Respublikası arasında hidro və elektroenergetika sahələri üzrə əməkdaşlıq haqqında Memorandum” imzalanıb. Adıçəkilən Memorandumda “Xudafərin” və “Qız qalası” hidroqovşaqlarının tikinti işlərinə başlanılmasına dair razılıq əldə edilib.
Adıçəkilən layihənin icrası ilə bağlı aparılan uzunmüddətli müzakirələrin nəticəsi olaraq stansiyaların tikintisi ilə bağlı “Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində “Xudafərin” və “Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş” 23 fevral 2016-cı il tarixdə imzalanıb.
Xatırladaq ki, bu günə qədər Qarabağda 4 min meqavat gücündə 9 elektrik stansiyası açılıb. Həmçinin, beş su elektrik stansiyası tikilir və bu layihələr 2022-ci ildə böyük ehtimalla tamamlanacaq. Bununla yanaşı, Laçın və Kəlbəcərdə 100 meqavat gücündə külək elektrik stansiyaların, həmçinin, 50 meqavatlıq günəş elektrik stansiyalarının tikintisi nəzərdə tutulub.
