SAHAR

Azərbaycan Respublikasının prezidenti ATƏT Minsk Qrupunun səriştəsizliyindən danışıb.

SəhərAzəri-nin məlumatına əsasən, İlham Əliyev BMT-nin Azərbaycan üçün yeni təyin olunmuş rezident əlaqələndiricisi Vladanka Andreyevanı qəbul edərkən deyib: "Təhlükəsizlik Şurasının daimi üzvü olan beş ölkədən üçü ATƏT-in Minsk qrupuna həmsədr olan və hələ də həmsədrlik edən ölkələrdir. Onlar özləri Qarabağ məsələsi ilə əlaqədar dörd qətnamə qəbul etmişlər. Bu qətnamələrin həyata keçirilməsinə imkan yaratmaq üçün onların mandatı var idi. Lakin, əfsuslar olsun ki, 28 il ərzində Minsk qrupu çox imkanları əldən verib."

Dövlət başçısı bildirib ki, toqquşmanın, müharibənin qarşısının alınması üçün bir yol ola bilərdi. Rəsmi Bakı məsələni sülh yolu ilə həll etmək istəyirdi. Əgər Ermənistana qarşı vaxtında sanksiyalar tətbiq edilsəydi, əgər Minsk qrupunun həmsədrləri, dünyanın üç aparıcı ölkəsi potensialının 5 faizini Ermənistanı öz işğalçı qüvvələrini geri çəkməyə inandırmağa və ya məcbur etməyə istifadə etsəydi, müharibə baş verməzdi. Odur ki, müharibəyə görə məsuliyyət yalnız Ermənistanın üzərində deyil, həmçinin onu beynəlxalq hüquqa riayət etməyə məcbur edə bilməyən və ya bunu etmək istəməyənlərin üzərinə düşür.