SAHAR

NATO-nun Moskva qarşısındakı hücum siyasətlərinin davamında Latviyanın Rusiya ilə sərhədlərində yerləşmək üçün ABŞ-ın tank və zirehli avtomobillərindən ibarət ilk qrup Latviyaya daxil olub.

Əlaləm telekanalının məlumatına görə, Latviyanın Müdafiə Nazirliyi bir bəyanatda Amerikanın "M1 Abrams" tankları və "Berdli" tipli zirehli avtomobillərindən ibarət ilk qrupun Latviyaya daxil olmasından xəbər verib, amma onların sayına işarə etməyibdir.

Bu məlumata görə, NATO-nun hərbi proqramları çərçivəsində fevralın ikisində 25, fevralın beşində isə 225 amerikalı hərbçi Latviyaya daxil olub.

NATO başçıları ötən il Varşavada keçirdikləri iclasda qərara aldılar ki, bu hərbi blokun çoxmilliyyətli qüvvələri Estoniya, Litva və Latviyada yerləşdirilsin.

NATO cari milad ilinin əvvəlində Avropanın şərqində Amerikanın 4-cü piyada diviziyasını yerləşdirib.

Moskva NATO qüvvələrinin öz sərhədləri yaxınlığında iştirakının nəticələri barədə dəfələrlə xəbərdarlıq edib və bildiribdir ki, bu hərəkətləri qarşılıqlı reaksiya ilə cavablandıracaqdır.