Əlaqələr yenidən bərpa olunur;
Emmanuel Makron ilə Co Bayden arasında telefon danışığı olub
Vaşinqton ilə Paris arasında "Akus" təhlükəsizlik müqaviləsi ilə əlaqədar bir aydan çox davam edən münasibətlərin gərginləşməsindən sonra Ağ Ev, ABŞ prezidenti Co Baydenin fransalı həmkarı Emmanuel Makronla ikitərəfli əməkdaşlıq haqqında telefonla danışdığını bildirib.
SəhərAzəri-nin məlumatına əsasən, Ağ Ev bir bəyanatda bildirib ki, ABŞ və Fransa liderləri, Hind-Sakit okean bölgəsində sabitlik və təhlükəsizliyi qorumaq və əməkdaşlığı gücləndirmək üçün komandalarının davamlı səylərini nəzərdən keçiriblər.
Bəyanatda deyilir: "Bayden və Makron, həmçinin xüsusən də NATO-nu tamamlayan və qlobal təhlükəsizliyə töhfə verən daha güclü bir Avropa müdafiəsinin qurulmasını nəzərdən keçiriblər".
Bəyanata əsasən, Bayden, həmçinin bu ayın sonunda İtaliyanın Roma şəhərində Makronla görüşməkdə maraqlıdır və Fransa-Amerika əməkdaşlığının bir çox sahələrini müzakirə edəcəklər.
